Proiektuaren deialdia: Osasuneko ikerketa- eta garapen-proiektuetarako laguntzak 2023: Osasun-arloko ikerketa-jarduera sustatzea

Erakunde finantzatzailea: Osasun Saila, Eusko Jaurlaritza

Espediente zk.: 2023111085

Biosistemaken IN: Borja García-Lorenzo

Emandako finantzaketa: 66.599,82 €

Deskribapena: Proiektu honek Balioan Oinarritutako Arreta inplementatzeko eta mailakatzeko tresna eta aurrerapen metodologikoak eskaintzen ditu, hala nola: pazientearen esperientzia (Patient Related Experience, PRE) neurtzen duten galdetegiak baliozkotzea eta Porterren eta besteren balioaren ekuazioaren zenbakitzailerako adierazle konposatu bat kalkulatzea. Balioan Oinarritutako Medikuntzak osasun-arretaren erdigunean kokatzen ditu pazienteak, eta kontuan hartzen ditu osasun-sistema hobetzeko erabakietan eta ekintzetan. Pazienteak pertsonalizatzeko aukera ematen du, tratamenduak pazienteen erantzun zehatzaren arabera doitu ahal dituelako; jardunbide egokiagoak partekatzeko aukera ematen du, eta, gainera, prozesuak optimizatzean, sistema iraunkorrago bihurtzen du.
Horretarako, ezinbestekoa da pazientea ardatz dituen emaitzak (Patient Centered Outcomes, PCO) estandarizatzea eta sistematikoki neurtzea. Emaitza horietan sartu behar dira pazienteek jakinarazitako emaitzak (Patient Reported Outcomes, PRO), pazientearen esperientzia (Patient Related Experience, PRE), klinikarekin lotutako emaitzak (Clinical Related Outcomes, CRO), eta laguntza-prozesuari lotutako emaitzak (Care-Process Related Outcomes, CAPRO). Horregatik, Balioan Oinarritutako Arretak aukera ematen du osasun-informazioko sistemak diseinatzeko eta hobetzeko, paradigma epistemologikoa eta, beraz, erabakiak hartzeko modua aldatzeko.

Helburua: Balioaren ekuazioaren zenbakitzailea pazientean oinarritutako emaitzen (Patient-Centered Outcomes, PCO) adierazle konposatu gisa sortzea, hala definituta: pazienteek jakinarazitako emaitzak (Patient Reported Outcome, PRO), pazientearen esperientziaren emaitzak (Patient Related Experience, PRE), klinikarekin lotutako emaitzak (Clinical Related Outcomes, CRO), eta laguntza-prozesuarekin lotutako emaitzak (Care-Process Related Outcomes, CAPRO). Lehen Mailako Arretarako sarbide-eredu berriak aztertu nahi ditu, baita eredu horretatik sor daitezkeen desberdintasunak ere, horiek konpontzeko estrategiak diseinatzeko.

• Pazientearen esperientziaren emaitzak (Patient Related Experience ,PRE) neurtzeko erabiliko diren galdetegien propietate psikometrikoak (baliotasuna eta fidagarritasuna) ebaluatzea.
• Pazienteak jakinarazitako emaitzek (Patient Reported Outcome, PRO) balioaren ekuazioaren zenbakitzailearen adierazle konposatuan duten inpaktua ebaluatzea.
• Klinikarekin lotutako emaitzek (Clinical Related Outcomes, CRO) balioaren ekuazioaren zenbakitzailearen adierazle konposatuan duten inpaktua ebaluatzea.
• Laguntza-prozesuarekin lotutako emaitzek (Care-Process Related Outcomes,CAPRO) balioaren ekuazioaren zenbakitzailearen adierazle konposatuan duten inpaktua ebaluatzea.
• Pazientearen esperientziaren emaitzek (Patient Related Experience, PRE) balioaren ekuazioaren zenbakitzailearen adierazle konposatuan duten inpaktua ebaluatzea.

Disenua:Kohorte prospektiboko luzetarako behaketa-azterketa da. Bularreko minbizia duten pazienteak aztertuko dira, laguntza-prozesuko hiru fasetan jarraipena eginda:

• Diagnostikoa: diagnostikoa baieztatzen den kontsulta.
• Tratamendua: lehenengo tratamendua hasten duen osasun-zentroarekin harremana.
• Jarraipena: diagnostikoa eman zenetik hasi eta 12 hilabete arte.

Espero diren emaitzak: Balioaren ekuazioaren zenbakitzaileak, bularreko minbiziaren testuinguruan ez ezik, beste edozein egoera medikotan ere tresna metodologiko gisa erabilgarria izan behar du. Balioan Oinarritutako Arretan aurreratutakoak baliagarria behar du izan, pazientea ardatz hartuta, emaitzak neurtu eta ebaluatuta eta pazienteari jakinarazteko erabilita, profesionalek, pazienteei laguntza ematerakoan, erabakiak hartzen laguntzeko zentroen eta pazienteen arteko benchmarkinga egiteko, jardunbide egokienak identifikatzen eta partekatzen laguntzeko, eta ebidentzian oinarritutako osasun-zerbitzuak optimizatzeko. Horretarako, laguntza-ibilbideak berriz diseinatuko dira, eginkizun berriak sortzea, baliabideak birbanatzea eta prozesu erredundanteak edo balio txikikoak deuseztatzea barne.

Gainera, Balioan Oinarritutako Arretaren bidez ebaluazio-esparru sendoa eta ebidentzian oinarritutakoa lortzen bada, osasun-agintaritzei lagunduko die diseinatzen balioagatiko ordaintzea sustatuko duten mekanismoak, eta orain arte mundu osoko osasun-sistemetan erabili den jardueragatiko ordaintzea ordezkatuko luke. Osasun-zerbitzuak pazienteei emandako balioaren arabera ordaintzeko baldintzatzea aztertu beharreko bidea da, eta halako azterketek tresna baliagarriak eskaintzen dituzte, pazienteentzat garrantzitsua den hori zorrotz neurtzen laguntzeko.