Erandioko Tokiko Osasun Sarearen lehen bilera
Udalerriak HEALTH4EUkids proiektu europarraren esparruan garatutako “Erandio mugitzen ari da!” ekintza komunitarioko proiektua bultzatzen du.
Joan den martxoaren 27an, Merkatu Zaharra Erandion egin zen osasun komunitariorako funtsezko lehen topaketa, Tokiko Osasun Sarearen lehenengo bilerarekin. Bilera horretan, “Mugitzen ari da!” Erandioko 2025-2027 Ekintza Plana diseinatzen hasi zen. Ekimen hau HEALTH4EUkids proiektu europarrean kokatzen da. Proiektu horren helburua haurren obesitatea prebenitzea eta herritarren osasuna eta ongizatea sustatzea da, ingurune eta espazio komunitarioak eraldatuz. Europako proiektuan bi jardunbide egoki transferitzen ari dira EBko 12 herrialdetan, eta Erandio da Euskadin hautatutako udalerri pilotua.
Biosistemak eta Eusko Jaurlaritzako Osasun Saileko Osasun Publikoko Zuzendaritza dira proiektu honetan Euskadi ordezkatzen duten erakundeak. Bi erakundeak proiektu hori koordinatzen ari dira Bizkaiko udalerrian, eta bertan hainbat jarduera egin dira testuingurua aztertzeko eta biztanleriaren benetako beharrak ikusteko, udalerriko haurren benetako premiei erantzungo dieten ekintzak lehenesteko eta definitzeko, batez ere egoera txarrenean dauden inguruneetan.
Erandion ‘Grünau Moves’ praktika egokia egokitzen eta transferitzen ari dira. Praktika hori jatorriz Alemanian garatu zen, eta Europako Batzordeak lehenetsi zuen. Praktika horrek erakutsi du eraginkorra dela ohitura osasungarriak sustatzeko. Institutuaren lana esperientzia hori lekualdatzea da, tokiko ezarpenak oinarri zientifikoa izango duela eta ebaluatzeko modukoa izango dela ziurtatuz, udalerriaren berezitasun sozioekonomikoei arreta berezia eskainiz.
Prozesu parte-hartzaileak eta ekintza-ildoak
Tokiko Osasun Sarearen lehen bilerak komunitateko ordezkaritza zabala bildu zuen, Hezkuntza, Kirola eta Gizarte Ekintza arloetako udal-arduradunak barne; lehen mailako arretako eta osasun mentaleko osasun-profesionalak; ikastetxeetako zuzendariak eta orientatzaileak, kirol-elkarteetako ordezkariak, erretiratuak eta gizarte-kolektiboak, bai eta Erandioko bizilagunak ere.
Lan-saioan hainbat dinamika gauzatu ziren testuingurua aztertzeko egindako jardueretan jasotako proposamenak eta ekintzak lehenesteko. Parte-hartzaileek lehenetsitako ekintzak honako hauekin lotzen dira: nutrizioari eta ohitura osasungarriei buruzko hezkuntzarekin, jarduera fisikoa sustatzen duten hiri-espazioak sortzearekin, gazteentzako laguntza psikologikoko zerbitzuak indartzearekin eta teknologien erabilera arduratsuari buruzko kontzientziazio-kanpainekin.
Hurrengo urratsak eta helburuak
Prozesuak datozen asteetan jarraituko du behin betiko 2025-2027 Ekintza Plana idazten, parte hartzen duten eragile guztien ekarpenak jasoko dituena. Aurreikuspenen arabera, lehenengo ekintzak 2025a amaitu baino lehen hasiko dira ezartzen, haurren ingurunea, ohiturak, osasuna eta ongizatea hobetzeko eta osasun-arloko desberdintasunak murrizteko.
HEALTH4EUKids-ek, 2025ean amaituko denak, inguruneetan partaidetza-prozesuak sustatuko dituen ekintza berritzailea izan nahi du, hainbat testuingurutan haurrentzat osasungarriagoak diren inguruneak sortzeko, politika publikoetan eta hiri-plangintzan aldaketak eginez, premia sozial handienak dituzten auzoetan arreta berezia jarriz.
